स्तन र पाठेघरको क्यान्सरको जोखिम घटाउन काठमाडौँमा निःशुल्क स्वास्थ्य शिविर, १५० लाभान्वित

काठमाडौँ । महिलाहरूको स्वास्थ्यप्रति सचेतना बढाउने उद्देश्यले डिल्लीबजारस्थित कन्या विद्याश्रम माविमा स्तन तथा पाठेघरको मुखको क्यान्सरसम्बन्धी निःशुल्क स्वास्थ्य शिविर सम्पन्न भएको छ।

नेपाल उद्योग वाणिज्य महासंघअन्तर्गतको महिला उद्यमी विकास समिति, नेपाल फर्निचर तथा फर्निसिङ व्यवसायी महासंघ र लायन्स क्लब अफ काठमाडौँ सेन्टरको संयुक्त आयोजनामा भएको शिविरमा क्यान्सर सेन्टर ललितपुरले प्राविधिक सहयोग गरेको थियो।

शिविरमा नेपाल क्यान्सर हस्पिटल तथा रिसर्च सेन्टर भक्तपुरका वरिष्ठ क्यान्सर रोग विशेषज्ञ डा. मुरारीमान श्रेष्ठ, डा. अनुशा शर्मा, डा. सुनिता श्रेष्ठसहितको टोलीले १५० जना महिलाहरूको स्तन क्यान्सर, पाठेघरको मुखको क्यान्सर तथा अन्य स्त्रीरोगसम्बन्धी निःशुल्क परीक्षण गरेका थिए।

कार्यक्रमलाई सम्बोधन गर्दै डा. मुरारीमान श्रेष्ठले भने, “क्यान्सरको प्रारम्भिक पहिचानले उपचार सम्भव छ। यस्ता शिविर र सचेतना कार्यक्रमले धेरै महिलाको ज्यान जोगाउन सकिन्छ।”

यस्तै, नेपाल उद्योग वाणिज्य महासंघका अध्यक्ष चन्द्रप्रसाद ढकालले महिला स्वास्थ्य जस्तो संवेदनशील विषयमा महासंघले निरन्तर सामाजिक उत्तरदायित्व निर्वाह गर्दै आएको बताउँदै यस्ता कार्यक्रमले महिलाको स्वास्थ्य सचेतना र जीवनस्तर उकास्न ठूलो योगदान पुर्‍याउने विश्वास व्यक्त गरे।

महासंघकी उपाध्यक्ष तथा महिला उद्यमी विकास समितिकी संयोजक ज्योत्सना श्रेष्ठले समुदायस्तरमा क्यान्सरप्रति जागरण ल्याउन यस्ता शिविर अत्यन्त प्रभावकारी रहेको बताइन्।

शिविर सफल बनाउन सहयोग गर्ने सबै संघ–संस्था, चिकित्सक, स्वास्थ्यकर्मी र स्वयंसेवकप्रति महिला समिति सभापति कमला श्रेष्ठले हार्दिक धन्यवाद व्यक्त गरिन्।

महिलाहरूको स्वास्थ्यमा देखिएको चासो र शिविरमा उल्लेख्य सहभागिताले आयोजकहरूलाई थप हौसला मिलेको छ। यस्ता कार्यक्रम आगामी दिनमा पनि निरन्तर हुने आयोजकले जनाएका छन्।