म्यानमारको स्क्याम सेन्टरबाट उद्धार : ३७ नेपाली स्वदेश फिर्ता, थप २९ जनाको उद्धार प्रक्रिया तीव्र

काठमाडौँ। आकर्षक रोजगारीको प्रलोभनमा परी म्यानमार पुगेका र त्यहाँ साइबर ठगी (अनलाइन स्क्यामिङ) केन्द्रमा बन्धक बनाइएका ३७ जना नेपाली नागरिकलाई आज स्वदेश फर्काइएको छ ।

थाइल्याण्डस्थित नेपाली राजदूतावासको पहल तथा थाइल्याण्डका सुरक्षा निकायहरूको सहयोगमा उद्धार गरिएका ती नागरिकलाई आज मिति २०८२ मंसिर ५ गते नेपाल वायुसेवा निगमको उडान नं. RA-402 मार्फत त्रिभुवन अन्तर्राष्ट्रिय विमानस्थलमा अवतरण गराइएको हो ।

उद्धार गरिएका व्यक्तिहरू गत अक्टोबर १९, २०२५ (२०८२ कात्तिक २) मा म्यानमारको अवैध स्क्याम सेन्टरमा म्यानमारी सुरक्षाकर्मीको छापा परेपछि भागेर थाइल्याण्ड प्रवेश गरेका थिए । उनीहरूलाई अनलाइन डेटिङ, क्यासिनो, गेमिङ, फिसिङ तथा क्रिप्टोकरेंसी ठगीजस्ता गैरकानुनी काममा जबर्जस्ती लगाइएको थियो ।

थप २९ जनाको उद्धार चाँडै

राजदूतावासका अनुसार अझै पनि म्यानमारको म्यावडी क्षेत्रमा २३ जना, थाइल्याण्डको मेसोटमा २ जना र कम्बोडियामा ४ जना नेपाली अलपत्र परेका छन् । उनीहरूलाई यथाशीघ्र स्वदेश फर्काउने प्रक्रिया अन्तिम चरणमा पुगेको र सम्बन्धित देशका निकायहरूसँग निरन्तर समन्वय भइरहेको राजदूतावासले जनाएको छ ।

राजदूतावासको कडा चेतावनी

नेपाली राजदूतावास बैंककले विज्ञप्ति जारी गर्दै नेपाल सरकारले तोकेको मापदण्डअनुसार श्रम स्वीकृति लिएर मात्र वैदेशिक रोजगारीमा जान सबैमा पुन: अनुरोध गरेको छ । “छिटो र धेरै पैसा कमाउने लोभमा कम्बोडिया, लाओस, म्यानमार, थाइल्याण्डलगायतका देशमा भ्रमण भिसामा गएर अवैध काम नगर्नुहोस्,” विज्ञप्तिमा भनिएको छ ।

साथै, सञ्चारमाध्यम र नागरिक समाजलाई पनि यो खतराबारे व्यापक सचेतना फैलाउन राजदूतावासले आग्रह गरेको छ ।

पछिल्लो समय दक्षिणपूर्वी एसियाली देशहरूमा नेपालीहरू साइबर ठगी गिरोहको फन्दामा पर्ने क्रम बढ्दै गएकाले सरकारले यसलाई गम्भीर रूपमा लिएको छ । उद्धार भएका व्यक्तिहरूलाई परिवारको जिम्मा लगाइएको र आवश्यक परामर्श तथा पुनर्स्थापना प्रक्रिया अगाडि बढाइने जनाइएको छ ।