ग्लोबल आइएमई बैंकले एक वर्षमा कमायो ६ अर्ब, वितरणयोग्य नाफा अर्बक्लबमा हुँदा अन्य सूचक कस्ता?

काठमाडौँ।  ग्लोबल आइएमई बैंक लिमिटेडले गत आर्थिक वर्ष २०८०/८१ मा ६ अर्ब १ करोड रूपैयाँ नाफा आर्जन गरेको छ। 

बैंकले सार्वजनिक गरेको गत आर्थिक वर्ष २०८०/८१ को चौथो त्रैमाससम्मको अपरिष्कृत वित्तीय विवरण अनुसार बैंकको नाफा अघिल्लो बर्ष २०७९/८० को तुलनामा १०.१३ प्रतिशतले घटेको हो। आर्थिक वर्ष २०७९/८० मा बैंकले ६ अर्ब ६९ करोड ४३ लाख रूपैया नाफा कमाएको थियो।

समीक्षा अवधीमा बैंकको खुद ब्याज आम्दानी २.७४ प्रतिशतले घटेको छ। यस अवधिमा बैंकले १६ अर्ब ६३ करोड रूपैयाँ खुद ब्याज आम्दानी गरेको छ। अघिल्लो आ.व.को सोही अवधीमा बैंकले १७ अर्ब १० करोड रूपैयाँ खुद ब्याज आम्दानी गरेको थियो।

यता, यसैअवधिमा बैंकले ८ अर्ब ७४ रूपैयाँ सञ्चालन मुनाफा आर्जन गरेको छ। अघिल्लो आर्थिक वर्षको तुलनामा उक्त मुनाफा ८.२५ प्रतिशतले कम हो। अघिल्लो आर्थिक वर्षको सोहि अवधिमा बैंकको सञ्चालन मुनाफा ९ अर्ब ५३ करोड रूपैयाँ रहेको थियो।

समीक्षा अवधिमा बैंकको खराब कर्जा ३‍.१५ प्रतिशतबाट बढेर ४.३७ प्रतिशत पुगेको छ। ३६ अर्ब १२ करोड रूपैयाँ चुक्ता पूँजी रहेको बैंकको जगेडा कोषमा २४ अर्ब ८५ करोड रूपैयाँ सञ्चित रहेको छ।

यस अवधिमा बैंकको निक्षेप १४.३४ प्रतिशत बढेको छ। कर्जा लगानी ४.२३ प्रतिशत बढेको छ। सो अवधिसम्ममा बैंकको वितरणयोग्य मुनाफा भने १ अर्ब १० करोड रूपैयाँ रहेको छ।

नाफासँगै बैंकको प्रतिशेयर आम्दानी पनि घटेको छ। समीक्षा अवधिमा बैंकको प्रतिशेयर आम्दानी २ रूपैयाँ ६ पैसा घटेर १६ रूपैयाँ ६५ पैसामा झरेको छ। असार मसान्तसम्ममा बैंकको प्रतिशेयर नेटवर्थ १६९ रूपैयाँ ८१ पैसा र मूल्य आम्दानी अनुपात ११.६६ गुणा रहेको छ।