कञ्चनजङ्घा शिखर आरोहणको ७०औं वार्षिकोत्सव मनाइँदै

काठमाडौँ । सन् १९५५ मा पहिलो पटक आरोहण गरिएको विश्वको तेस्रो अग्लो हिमाल, कञ्चनजङ्घाको ७०औं वार्षिकोत्सव मनाइने भएको छ। यस अवसरमा हिमाल पर्यटन प्रवर्द्धन, जैविक विविधताको संरक्षण तथा स्थानीय समुदायको समृद्धि अभिवृद्धि गर्ने उद्देश्यसहित विशेष कार्यक्रम आयोजना गरिँदैछ।

कञ्चनजङ्घा संरक्षण क्षेत्र व्यवस्थापन परिषद् (KCAMC) ले आगामी २०२५ अप्रिल १८-२० मा ताप्लेजुङको लेलेपमा तीनदिने कार्यक्रम आयोजना गर्नेछ। यस समारोहमा आरोहीहरू, अनुसन्धानकर्ता, पर्यटन व्यवसायी तथा सरकारी तथा गैर-सरकारी निकायहरू सहभागी हुनेछन्।

यसै क्रममा, अप्रिल २४, २०२५ मा काठमाडौंस्थित अलोफ्ट होटलमा विशेष समारोह आयोजना गरिनेछ। सो कार्यक्रममा अनुभवी नेपाली पर्वतारोहीहरू, वातावरणविद् तथा सरकारी अधिकारीहरूले सम्बोधन गर्नेछन्। कार्यक्रम अन्तर्गत ‘कञ्चनजङ्घा: पाँच खजाना’ शीर्षकमा वृत्तचित्र प्रदर्शन, फोटो प्रदर्शनी तथा विज्ञ प्यानल छलफल आयोजना गरिनेछ।

यस पर्वका प्रमुख उद्देश्यहरू निम्नानुसार छन्:

कञ्चनजङ्घा पर्वतारोहणको ७० वर्षे इतिहासलाई सम्मान गर्दै हिमाल आरोही तथा शेर्पा गाइडहरूको योगदानको कदर।

हिमाली वातावरण संरक्षण तथा जलवायु परिवर्तनको प्रभावबारे जनचेतना फैलाउने।

स्थानीय समुदायको सांस्कृतिक सम्पदा प्रवर्द्धन गर्दै पर्यटन मार्फत आर्थिक उन्नति गर्ने।

पर्वतारोहण सुरक्षाका लागि नवीनतम प्रविधि र नियमहरूबारे छलफल गर्ने।

यस उत्सवलाई युनेस्को, नेपाल पर्यटन बोर्ड, WWF, ICIMOD, SNV नेपाल, नेपाल पर्वतारोहण संघ लगायतका संस्थाहरूको समर्थन रहेको छ।