नेपालमा लगानीको उपयुक्त समय: युएई लगानीकर्तालाई अध्यक्ष ढकालको आग्रह

काठमाडौं। नेपाल उद्योग वाणिज्य महासंघका अध्यक्ष चन्द्र प्रसाद ढकालले संयुक्त अरब इमिरेट्स (युएई) का लगानीकर्ताहरूलाई नेपालमा लगानी गर्न आग्रह गरेका छन्। बिहीबार काठमाडौंमा आयोजित "युएई आर्थिक प्रवर्द्धन कार्यक्रम" मा बोल्दै अध्यक्ष ढकालले नेपालको पछिल्लो समयको आर्थिक सुधार, लगानीमैत्री वातावरण र स्थायित्वलाई युएईका लगानीकर्ताहरूका लागि सुनौलो अवसरको रूपमा प्रस्तुत गरे।

अध्यक्ष ढकालले आफ्नो सम्बोधनमा ३० भन्दा बढी कानुन संशोधन भइसकेको र द्विपक्षीय लगानी सम्झौता अन्तिम चरणमा पुगेको जानकारी दिँदै उर्जा, पर्यटन, कृषि प्रशोधन र सूचना प्रविधि जस्ता क्षेत्रमा युएईका लगानीकर्तासँग सहकार्यको ठूलो सम्भावना रहेको बताए।

"नेपाल अहिले स्थायित्व र सम्भावनाको चरणमा छ," अध्यक्ष ढकालले भने, जलविद्युत, सौर्य उर्जा, प्रसारण लाइन, रिसोर्ट, साहसिक पर्यटन, कृषि उत्पादन प्रशोधन तथा आइसीटी आउटसोर्सिङजस्ता क्षेत्रमा संयुक्त लगानीका लागि उपयुक्त समय हो।

उनले युएईलाई नेपालको विश्वासिलो मित्रको रूपमा स्मरण गर्दै, रोजगारीमार्फत नेपाललाई सामाजिक–आर्थिक योगदान पु¥याउँदै आएकोमा धन्यवाद दिए। साथै, युएईमा कार्यरत ३ लाखभन्दा बढी नेपालीलाई लक्षित गर्दै वित्तीय सेवा, सीप विकास, तालिम केन्द्र स्थापना लगायत क्षेत्रमा लगानी गर्न पनि अनुरोध गरे।

महासंघ युएईका लगानीकर्ताहरूका लागि आवश्यक सम्पर्क, मार्गदर्शन र सहजीकरण गर्न पूर्ण रूपमा तयार रहेको उल्लेख गर्दै अध्यक्ष ढकालले दुबई चेम्बर अफ कमर्ससँगको सहकार्यलाई थप सशक्त बनाउँदै संयुक्त सम्मेलनहरू आयोजना गर्ने योजना पनि सार्वजनिक गरेका छन्।

यस कार्यक्रमले नेपाल–युएईबीचको आर्थिक सहकार्यलाई अझ मजबुत बनाउने अपेक्षा गरिएको छ।