वास्तु अनुसार छतमा पानी ट्याङ्की कुन दिशामा राख्ने?

काठमाडौँ।  के तपाईं घरनिर्माण गर्दै हुनुहुन्छ? यदि त्यसो हाे भने पानी ट्याङ्कीलाई कता राख्ने भन्ने कुरामा ध्यान दिन जरूरी हुन्छ। 

वास्तु बशास्त्र अनुसार आवासगृह अर्थात् घर र शास्त्रको अर्थ हुन्छ अनुशासन र निर्देश। यसर्थ, “वास्तु शास्त्र” भन्नाले घर वा कुनै पनि संरचना कसरी निर्माण गर्ने भन्ने कुराको निर्देशलाई बुझिन्छ।  वास्तु शास्त्रलाई आधुनिक समयको विज्ञान र आर्किटेक्चरको प्राचीन स्वरूप मान्न सकिन्छ।

हिन्दू धर्म अनुसार वास्तु शास्त्रको पालन गरी बनाइएको घरमा बस्दा सुख, शान्ति एवं समृद्धि प्राप्त हुन्छ। हामी यसमा वास्तु शास्त्र अनुसार छतमा पानीको ट्याङकी कुन दिशामा राख्दा राम्रो हुन्छ भन्ने बारे बिस्तृत छलफल गर्ने छौँ। 

अहिले शहर बजारमा आधुनिक घरहरू निर्माण गरि पानी ट्याङ्कीलाई घरको छतमा राख्ने परम्परा रहेको छ। कतिपय मानिसले पानी ट्याङकी राख्ने समयमा वास्तुशास्त्र अनुसार उचित ठाउँमा राख्दछन् भने कतिपयले कुन दिशामा ट्याङ्की राख्ने भनेर विचारै गरेको देखिँदैन। तथापी, वास्तुशास्त्रका अनुसार पानीको ट्याङ्कीले वास्तुलाई निकै प्रभाव पार्दछ।

पानी ट्याङकी उपयुक्त दिशामा नहुँदा घरमा बस्ने मानिसमा आर्थिक झमेला वा पारिवारिक समस्या निम्तिन्छ। उन्नती प्रगतीमा पनि बाधा अवरोध आउछ भने घरमा बस्ने मानिसको स्वास्थ्यमा पनि प्रतिकुल असर पार्दछ।

त्यसैले पानीको ट्याङ्कीलाई घरमा राख्नु अघि वास्तुलाई विशेष ध्यान पुर्याउन जरूरी छ। वास्तु विज्ञानका अनुसार घर भित्र पानी राख्नका लागी उत्तर र पूर्वी दिशा उत्तम मानिन्छ छ। यी दिशामा घरभित्र पानीको भाडा, घैंटो, वाटर प्युरिफाएर, जलपात्र हुनु निकै शुभ मानिन्छ। तर यही दिशामा छतमा पानीको ट्याङ्की राख्दा भने वास्तु दोष लाग्दछ। यसले व्यापारमा हानी नोक्सान, घरमा बस्ने व्यक्तिको स्वास्थ्यमा समस्या उत्पन्न गराई उपचार खर्च बढ्ने र आकस्मिक दुर्घटनाको सम्भावनालाई बढाउँछ।

वास्तु शास्त्र अनुसार छतमा पानीको ट्याङ्की दक्षिण पश्चिम अर्थात नैऋत्य कोणमा ठाउँ बनाएर राख्नु पर्दछ। यसरी राख्दा घरमा समृद्धी र उन्नती आउछ भने लामो समय सम्म सुख शान्तीको अनुभूति गर्न सकिन्छ।