देशभर बदली, कोशी र बागमतीमा मध्यम देखि भारी वर्षाको जोखिम

काठमाडौं | जल तथा मौसम विज्ञान विभागका अनुसार हाल मनसुनको न्यून चापीय रेखा सरदरभन्दा दक्षिणतिर अवस्थित छ। हाल कोशी, मधेश, बागमती र गण्डकी प्रदेशमा सामान्य बदली र बाँकी भू-भागमा आंशिक बदली देखिएको छ। कोशी प्रदेशका केही, मधेश, बागमती, गण्डकी प्रदेशका थोरै र लुम्बिनी प्रदेशका एक-दुई स्थानमा हल्कादेखि मध्यम वर्षा भइरहेको छ।

कोशी र बागमती प्रदेशका पहाडी भू-भागका एक-दुई स्थानमा भारी वर्षाको सम्भावना रहेको छ। आगामी २४ घण्टाको मौसम पूर्वानुमान अनुसार कोशी प्रदेशमा दिउँसो हिमाली क्षेत्रमा मध्यम र पहाडी क्षेत्रमा मध्यमदेखि भारी वर्षाको सम्भावना छ, तराईमा थोरै स्थानमा मध्यम वर्षा हुन सक्छ। राति हिमाली र पहाडी क्षेत्रमा मध्यमदेखि भारी, तराईमा मध्यमदेखि भारी वर्षाको जोखिम छ। मधेश प्रदेशमा दिउँसो तराईमा थोरै स्थानमा मध्यम र राति केही स्थानमा मध्यम वर्षाको सम्भावना छ। बागमती प्रदेशमा दिउँसो हिमाली र पहाडी क्षेत्रमा मध्यमदेखि भारी, तराईमा थोरै स्थानमा मध्यम वर्षा हुन सक्छ, राति हिमाली र पहाडी क्षेत्रमा मध्यम, तराईमा थोरै स्थानमा मध्यम वर्षाको सम्भावना छ। गण्डकी, लुम्बिनी, कर्णाली र सुदूरपश्चिम प्रदेशमा दिउँसो हिमाली र पहाडी क्षेत्रमा मध्यम, तराईमा थोरै स्थानमा मध्यम वर्षा सम्भावित छ, राति यी क्षेत्रमा आंशिक बदलीसहित थोरै स्थानमा मध्यम वर्षा हुने अनुमान छ।

कोशी र बागमती प्रदेशका पहाडी क्षेत्रमा भारी वर्षाको सम्भावना रहेकोले बाढी, पहिरो र जनजीवनमा असर पर्न सक्छ। सर्वसाधारण र सरोकारवाला निकायहरूलाई पछिल्लो मौसमी सूचना नियमित जाँच गरी सतर्क रहन विभागले अनुरोध गरेको छ।