मधेस प्रदेशमा रासायनिक मलको अभाव नहुने, पर्याप्त मौज्दात रहेको साल्ट ट्रेडिङ र कृषि सामग्री कम्पनी

वीरगञ्ज (पर्सा), २७ असार: यस वर्ष मधेस प्रदेशमा रासायनिक मलको अभाव नहुने भएको छ। साल्ट ट्रेडिङ कर्पोरेशन लिमिटेड र कृषि सामग्री कम्पनी लिमिटेडले पर्याप्त मौज्दात रहेको जनाउँदै मलको अभाव नहुने दाबी गरेका छन्।

साल्ट ट्रेडिङले ३० प्रतिशत र कृषि सामग्री कम्पनी लिमिटेडले ७० प्रतिशत रासायनिक मल आयात गरेर अनुदानबापत कम मूल्यमा किसानलाई उपलब्ध गराउँदै आएका छन्। पछिल्लो समय यी दुवै संस्थाले खेतीयोग्य जमिनको क्षेत्रफल, विगत आवको मलको खपतको अभिलेख, र बाली सघनताको आधारमा स्थानीय तहअनुसार मलको बाँडफाँट गर्दै आएका छन्।

साल्ट ट्रेडिङ कर्पोरेशन लिमिटेड प्रादेशिक कार्यालयका प्रमुख आमोज लामिछानेका अनुसार यस वर्ष रासायनिक मलको समस्या नहुने छ। “गत आवमा भन्दा चालु आवमा ८,८४५.१५ मेट्रिक टन धेरै मल वितरण भइसकेको छ, त्यसैले पनि विगतको वर्षमा जस्तै यो वर्ष रासायनिक मलको समस्या नहुने अपेक्षा गरेका छौँ,” उहाँले बताउनुभयो।

२०८१ असार २४ गतेसम्म, साल्ट ट्रेडिङले मधेस प्रदेशका आठ जिल्लामा कुल ५२,६५२.३५ मेट्रिक टन रासायनिक मल (युरिया, डिएपी, र पोटास) वितरण गरिसकेको छ। यसमा युरिया मलको हिस्सा २७,६१४.२५ मेट्रिक टन, डिएपी मलको हिस्सा २३,६८७.७० मेट्रिक टन, र पोटास मलको हिस्सा १,३६१.४० मेट्रिक टन रहेको छ। गत आवमा भने तिनै थरिका मल ४३,८०७.२० मेट्रिक टन वितरण गरिएको थियो।

कृषि सामग्री कम्पनी लिमिटेडका प्रादेशिक कार्यालय वीरगञ्जका कामु प्रमुख दुर्गाप्रसाद पाण्डेयका अनुसार चालु आवमा मलको आयातमा वृद्धि भएकाले पनि मधेस प्रदेशमा रासायनिक मलको समस्या नहुने छ। “गत आवको तुलनामा चालु आवमा ८,६४५ मेट्रिक टन रासायनिक मल धेरै प्राप्त भएको छ,” उहाँले भन्नुभयो।

कार्यालयले चालु आवको असार ११ गतेसम्म युरिया, डिएपी, र पोटास गरी कूल ९५,२०३.४० मेट्रिक टन रासायनिक मल प्राप्त गरेको छ। यसमा युरिया मल ६०,६८२.२५ मेट्रिक टन, डिएपी मल २८,९६३.४० मेट्रिक टन, र पोटास मल ५,५५७.७५ मेट्रिक टन रहेको छ। हालसम्म ८४,४२७.५० मेट्रिक टन मल मधेस प्रदेशसहितका अन्य जिल्लामा पठाइसकेको छ।

प्रादेशिक कार्यालय वीरगञ्जले पर्सा, बारा, रौतहट, महोत्तरी, धनुषा, र सर्लाही जिल्लामा मल उपलब्ध गराउने गर्छ, तर सिरहा र सप्तरी जिल्लामा भने कोशी प्रदेश कार्यालय मातहतबाट वितरण गरिन्छ।

गत आवमा कार्यालयले ८६,५५८.७५ मेट्रिक टन रासायनिक मल प्राप्त गरेको थियो, जसमा ७२,८२६ मेट्रिक टन मल १७ जिल्लामा पठाइएको थियो। यसबाहेक, कार्यालयले बागमती र गण्डकी प्रदेशका विभिन्न जिल्लामा पनि रासायनिक मल उपलब्ध गराउँदै आइरहेको छ।

कार्यालयमा अहिले थप प्राप्त भइरहेको युरिया ११,८०० मेट्रिक टन र डिएपी ९,५०० मेट्रिक टन रहेको छ।