घरजग्गा कारोबारबाट माघमा करिब ४ अर्ब राजस्व सङ्कलन

काठमाडौँ।  देशभर घरजग्गाको कारोबार सुधारोन्मुख देखिएको भएता पनि गत पुसको तुलनामा माघमा भने राजस्व सङ्कलनमा गिरावट आएको छ।

भूमि व्यवस्था तथा अभिलेख विभागका अनुसार गत माघ महिनामा ३ अर्ब ८७ करोड २४ लाख ८१ हजार ६ सय ४७ बराबर राजस्व सङ्कलन भएको छ। गत पुसमा रू ४ अर्ब २५ करोड २२ लाख २१ हजार ७ सय ७९ राजस्व सङ्कलन भएको थियो। विभागका अनुसार गत मङ्सिरमा रू ३ अर्ब ८७ करोड ४८ लाख २६ हजार ९ सय ७६ राजस्व सङ्कलन भएको थियो।

चालु आर्थिक वर्षको सात महिनाको विवरणअनुसार राजस्व सङ्कलनमा सामान्य वृद्धि भएको देखिन्छ। गत आ.व.को सोही अवधिको तुलना चालु आ.व.को सात महिनामा राजस्व सङ्कलनमा झण्डै १४ प्रतिशतले वृद्धि भएको छ। चालु आ‍.व‍.को माघ मसान्तसम्म कुल रू २४ अर्ब ७१ करोड बराबरको राजस्व सङ्कलन भएको भूमि व्यवस्था तथा अभिलेख विभागले जनाएको छ।

गत आवको सोही अवधिमा रू २१ अर्ब ६५ करोड बराबर राजस्व सङ्कलन भएको थियो। गत माघमा कुल ४६ हजार ५० हजार ६९ लिखत पारित भएको थियो भने गत पुसमा त्यो सङ्ख्या ४८ हजार एक सय ५६ थियो।

काठमाडौँ उपत्यकाभित्रका विभिन्न ९ वटा मालपोत कार्यालयमध्ये सबैभन्दा बढी भूमिसुधार तथा मालपोत कार्यालय लगनखेलले राजस्व सङ्कलन गरेको छ। सो कार्यालयले रू ३३ करोड ७४ लाख राजस्व सङ्कलन गरेको विवरणमा देखिन्छ।

त्यस्तै, डिल्लीबजार मालपोत कार्यालयले रू २६ करोड ९२ लाख, कलङ्की मालपोतबाट रू २६ करोड एक लाख, मालपोत कार्यालय चाबहिलले रू २० करोड ८० लाख तथा भक्तपुर मालपोत कार्यालयले रू २४ करोड ४२ लाख बराबरको राजस्व सङ्कलन गरेको विभागले जनाएको छ।