गौतमबुद्ध विमानस्थलमा फलाइ दुबई, जजिरा र एयर एशियाले उडान गर्दै, के छ तयारी ?

काठमाडौँ (रासस), २८ असोज: मुलुकको दोस्रो अन्तर्राष्ट्रिय विमानस्थल भैरहवास्थित गौतमबुद्ध अन्तर्राष्ट्रिय विमानस्थलमा तीनभन्दा बढी अन्तर्राष्ट्रिय एयरलाइन्सले उडान सुरु गर्ने भएका छन्। लामो समयसम्म व्यावसायिक अन्तर्राष्ट्रिय उडान हुन नसकेको विमानस्थलमा अब कुवेतको जजिरा, दुवईको फ्लाई दुबई र थाइल्याण्डको थाई एयर एशियाले उडान सञ्चालन गर्ने तयारी गरेका हुन्।

फ्लाई दुबईले कात्तिक २४ गतेदेखि दुबई–भैरहवा र भैरहवा–काठमाडौँ हुँदै दुबई उडान सुरु गर्नेछ। यसले हप्ताको सातै दिन सेवा दिनेछ। विमान दिउँसो १ः४५ बजे भैरहवा आएर ३ः३० बजे काठमाडौँ हुँदै दुबई उड्नेछ। यसअघि जजिरा एयरले पनि कात्तिक १२ गतेदेखि पुनः उडान सुरु गर्नेछ। यसले मङ्गलबार, बिहीबार र शनिबार उडान भर्नेछ।

थाई एयर एशियाले पनि छिट्टै गौतमबुद्ध विमानस्थलमा उडान सुरु गर्ने योजना बनाएको छ। उक्त एयरलाइन्सको प्राविधिक टोलीले विमानस्थलको भ्रमण गरी आवश्यक जानकारी लिएको छ। थाई एयर एशियाले एसियाका प्रमुख गन्तव्यमा करिब ६० वटा विमानमार्फत उडान सञ्चालन गरिरहेको छ, र नेपाल–थाइल्याण्डबीचको पर्यटन सम्बन्धलाई अझ सुदृढ गर्ने विश्वास गरिएको छ।

महाप्रबन्धक प्रतापबाबु तिवारीले दुई अन्तर्राष्ट्रिय विमानस्थल पूर्ण क्षमतामा सञ्चालन गर्ने सरकारको कार्ययोजनाअनुसार गौतमबुद्ध विमानस्थलमा उडान सञ्चालनको वातावरण बनाइएको जानकारी दिनुभयो। अध्यागमन, भन्सार, सुरक्षालगायत सबै व्यवस्थापन तयारी अवस्थामा रहेको र विमानस्थलमा २१ वटा यात्रु सेवा काउन्टर जडान भएको बताइएको छ।

सरकारले गौतमबुद्ध र पोखरा अन्तर्राष्ट्रिय विमानस्थललाई पूर्ण क्षमतामा सञ्चालन गर्न सहुलियतसहितका प्याकेजहरू लागू गरेको छ। हवाई टिकट, ग्राउण्ड ह्यान्डलिङ, र इन्धनमा २०८३ साल भदौसम्म सहुलियत दिने योजना बनाइएको छ।