एनआईबिएल इक्विटी पार्टनर्सले डेलिस डेरिजमा लगानी गर्ने सम्झौतामा हस्ताक्षर

काठमाडौं। नेपालको अग्रणी प्राइभेट इक्विटी फर्म एनआईबिएल इक्विटी पार्टनर्सले डेलिस डेरिजसँग रु. ९ करोड ५० लाख को लगानी सम्झौतामा हस्ताक्षर गरेको छ। एनआईबिएल इक्विटी पार्टनर्स, विशिष्टीकृत लगानी कोष नियमावली, २०७५ अन्तर्गत दर्ता भएको र सेबोनद्वारा स्वीकृतिप्राप्त कोष प्रबन्धक एनआईएमबी एस क्यापिटल लिमिटेडको एकाइ हो। ३१ असार, २०८१ मा हस्ताक्षर भएको यस सम्झौताले आधुनिक र उच्च गुणस्तरको दुग्ध उत्पादनमा आफूलाई देशकै प्रथम स्थानमा स्थापित गर्ने चाहना राखेको डेलिस डेरिजको लक्ष्यलाई थप ऊर्जा प्रदान गरेको छ।

एनआईबिएल इक्विटी पार्टनर्सले डेलिस डेरिजको गुणस्तर र उत्कृष्टताप्रतिको प्रतिबद्धतालाई मान्यता दिएको छ। ‘डेलिस’ ब्राण्डको ग्रीक दहीले नबिनताको पहिचान दिएको छ भने ‘पञ्चमी’ ले स्थानीय नेपालीहरूको मन जित्न सफल भएको छ। यस लगानीले नेपाली बजारमा डेलिस ब्राण्डको स्थानलाई झन् मजबुत बनाउने भएको छ।

यस लगानी सम्झौताले डेलिस डेरिजलाई निम्न लाभ प्रदान गर्नेछ:

उत्पादन क्षमतामा वृद्धि: चितवनमा रहेको आफ्नो हालको कारखानामा प्राविधिक रूपमा उन्नत मेसिनरीहरूको खरिद गरी डेलिसका स्वादिष्ट उत्पादनहरूको बढ्दो मागलाई पूरा गर्न सक्नुका साथै, हालको १०,००० लिटर प्रति दिनको क्षमतालाई उल्लेखनीय रूपमा वृद्धि गर्न सक्ने।

प्रोडक्ट इनोभेसन: नयाँ परिकारहरूको उत्पादनका साथ नेपालभरका ग्राहकहरूलाई उत्कृष्ट स्वाद प्रदान गर्न सक्ने। बजारको पहुँचमा विस्तार: वितरण सञ्जालहरू बलियो बनाउँदै डेलिस उत्पादनहरूलाई नेपालभरका ग्राहकहरूमाझ पुर्‍याउन सक्ने।

देशकै अग्रणी चीज उत्पादक: आयातित विदेशी दुग्धको हालको निर्भरतालाई तोड्ने लक्ष्यसहित इलामको फिक्कलमा नयाँ अत्याधुनिक कारखाना निर्माण गर्न सक्ने। आईपीओ निष्कासन: घरेलु पूँजी बजारमा थप सकारात्मक प्रभाव पार्न आईपीओ निष्कासनको तयारी गर्न सक्ने।

एनआईएमबी एस क्यापिटल लिमिटेडका सीईओ शिवान्त बहादुर पाँडेज्यूले यस सम्झौताबारे उत्साह व्यक्त गर्दै भन्नुभयो, “एनआईबिएल इक्विटी पार्टनर्स डेलिस डेरीसँग साझेदारी गर्न पाउँदा निकै हर्षित छ। डेलिस डेरिजको क्वालिटी, इनोभेसन र स्थानीय समुदायलाई सहयोग प्रदान गर्ने प्रतिबद्धता हाम्रो मिशनसँग पूर्ण रूपमा मेल खान्छ। यस लगानीले नेपाली उपभोक्ताहरूलाई फाइदा पुर्‍याउने, रोजगारी सिर्जना गर्ने र राष्ट्रको समग्र आर्थिक विकासमा सहयोग पुग्नेमा हामी ढुक्क छौँ।”

डेलिस डेरिजका सह–संस्थापक र सीईओ सन्दीप पौडेलले आफ्नो उत्साह व्यक्त गर्दै भन्नुभयो, “एनआईबिएल इक्विटी पार्टनरको विशेषज्ञता र पूँजीले हाम्रो विकासको मार्गमा उल्लेखनीय भूमिका खेलेको छ। यो साझेदारीले नेपालको अग्रणी दुग्ध उत्पादकको रूपमा रहेको हाम्रो स्थानलाई थप बलियो बनाउनेछ। यस लगानी मार्फत स्वदेशमा उत्पादित विभिन्न प्रकारका चीज र उच्च गुणस्तरका दुग्ध उत्पादन सहित डेलिसलाई एउटा प्रख्यात ब्रान्डको रूपमा स्थापित गर्न सहयोग पुर्‍याउने कुरामा हामी विश्वस्त छौं।”

डेलिस डेरिजका प्राथमिकताहरु यस प्रकार रहेका छन्:

उत्कृष्ट गुणस्तर: उच्च गुणस्तर, प्राकृतिक र मिसावट–रहित दुग्ध उत्पादन मार्फत उपभोक्ताहरूको विश्वास जित्ने।

ग्राहकको स्वास्थ्यमा ध्यान: कम फ्याट र ग्लुटेन–रहित डेरी उत्पादनको आवश्यकताहरू पूरा गर्ने।

स्थानीय स्रोत र समर्थन: स्थानीय किसानहरूलाई सशक्त बनाउन दूध मूल्य निर्धारण कार्यक्रमहरूको पहल गर्ने।

बलियो जनशक्ति: ७० जनाको बलियो र सक्षम कर्मचारीहरूको टोली बनाउने।

यो लगानी सम्झौताले एनआईबिएल इक्विटी पार्टनर्स र डेलिस डेरिजको रोमाञ्चक नयाँ अध्यायको सुरुवात गरेको छ। यस साझेदारीले नेपालमा विश्वास र गुणस्तरको ब्राण्ड बन्ने डेलिसको लक्ष्यलाई थप ऊर्जा दिनेछ।