मनसुन कमजोर रहे पनि कोशी, गण्डकी र सुदूरपश्चिम प्रदेशमा भारी वर्षाको सम्भावना

काठमाडौँ ।   नेपालमा मनसुनको न्यून चापीय रेखा सरदर स्थानको दक्षिणतर्फ अवस्थित रहेकाले मनसुनको प्रभाव केही कमजोर रहेको मौसम पूर्वानुमान शाखाको अनुमान  छ। यद्यपि, बंगालको खाडीबाट जलवाष्पयुक्त हावाको प्रवाह निरन्तर छ। 

हाल कोशी, बागमती, गण्डकी र लुम्बिनी प्रदेशका पहाडी भू-भागमा सामान्यतया बदली र बाँकी क्षेत्रमा आंशिक बदलीको अवस्था छ। गण्डकी र सुदूरपश्चिम प्रदेशका पहाडी क्षेत्रका साथै लुम्बिनी र कर्णाली प्रदेशका एक-दुई स्थानमा हल्का वर्षा भइरहेको छ। भाद्र ०४, २०८२ मा कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशमा दिउँसो हिमाली क्षेत्रमा सामान्य बदलीसहित थोरै स्थानमा मध्यम वर्षा, पहाडी क्षेत्रमा सामान्य बदलीसहित कोशी, गण्डकी र कर्णालीमा मध्यमदेखि भारी वर्षा र अन्यमा मध्यम वर्षा, तथा तराई क्षेत्रमा आंशिकदेखि सामान्य बदलीसहित सुदूरपश्चिममा मध्यमदेखि भारी वर्षा र अन्यमा मध्यम वर्षाको सम्भावना छ। रातको समयमा हिमाली क्षेत्रमा सामान्य बदलीसहित थोरै स्थानमा मध्यम वर्षा, पहाडी क्षेत्रमा सामान्य बदलीसहित कोशी र गण्डकीमा मध्यमदेखि भारी वर्षा र अन्यमा मध्यम वर्षा, तथा तराई क्षेत्रमा आंशिकदेखि सामान्य बदलीसहित कोशीमा मध्यम वर्षा र सुदूरपश्चिममा मध्यमदेखि भारी वर्षाको सम्भावना छ।

आगामी २४ घण्टाका लागि चेतावनी तथा परामर्श

कोशी र गण्डकी प्रदेशको पहाडी क्षेत्र र सुदूरपश्चिम प्रदेशको तराई क्षेत्रका एक-दुई स्थानमा भारी वर्षाको सम्भावना रहेकोले पछिल्लो मौसमी सूचनाको जानकारी लिन सर्वसाधारण तथा सबै सरोकारवाला निकायहरूलाई अनुरोध गरिएको छ।