वीरगञ्ज नाकाबाट चारपाङ्ग्रे सवारीको आयात घट्यो, कति सङ्कलन भयो राजस्व?

काठमाडौँ। वीरगञ्ज भन्सार नाका हुँदै चालु आर्थिक वर्षको पाँच महिनामा चारपाङ्ग्रे सवारीसाधनको आयात घटेको छ। 

वीरगञ्ज भन्सार कार्यालयका अनुसार चालु आ.व.को पाँच महिनामा रू ९२ करोड ३ लाख ३६ हजार मूल्य पर्ने ४८२ जीप, कार र भ्यान आयात भएका छन्।

गत आ.व.को पाँच महिनाका तुलनामा चालु आ.व.को सोही अवधिमा सङ्ख्याको आधारमा ३८ दशमलव १३ प्रतिशत र राजस्वको आधारमा १६ दशमलव ४३ प्रतिशतले सवारीसाधनको आयात घटेको हो। 

गत आ.व.को सोही अवधिमा भने रू १ अर्ब २० करोड १४ लाख २ हजार मूल्य पर्ने ७७९ वटा जीप, कार र भ्यानको आयात भएको थियो। ती सवारीसाधन आयात हुँदा कार्यालयले रू २ अर्ब ८० करोड ९१ लाख राजस्व सङ्कलन गरेको थियो। 

इन्धनबाट चल्ने जीप, कार र भ्यानको मात्रै नभएर वीरगञ्ज नाका हुँदै भित्रिने चारपाङ्गे विधुतीय सवारीसाधनको पनि आयात घटेको भन्सारको तथ्याङ्कले देखाएको छ। 

चालु आ.व.को पाँच महिनामा यो नाका हुँदै रू १४ करोड ७८ लाख ६ हजार मूल्य पर्ने ९७ विधुतीय जीप, कार र भ्यानको आयात भएको छ।

गत आ.व.को पाँच महिनाको तुलनामा चालु आ.व.को सोही अवधिमा विधुतीय सवारीसाधनको सङ्ख्याका आधारमा आयात ५९ दशमलव ७ प्रतिशत र राजस्व सङ्कलनका आधारमा भने ५८ दशमलव ६३ प्रतिशतले गिरावट आएको छ। 

गत आ.व.को सोही अवधिमा भने ४६ करोड ५८ लाख ५३ हजार मूल्य पर्ने २३७ वटा विधुतीय जीप, कार र भ्यानको आयात भएको थियो। ती सवारीसाधन आयात हुँदा कार्यालयले रू २० करोड ३५ लाख ५८ हजार राजस्व सङ्कलन गरेको थियो।