नेपाल आदिवासी जनजाति महासंघको ११औं राष्ट्रिय महाधिवेशन माघ ९-१० गते विराटनगरमा हुने

काठमाडौं। नेपालका आदिवासी जनजातिहरूको छाता संगठन नेपाल आदिवासी जनजाति महासंघ (NEFIN) को ११औं राष्ट्रिय महाधिवेशन आगामी २०८२ माघ ९ र १० गते प्रदेश नं. १ को राजधानी विराटनगरमा भव्य रूपमा आयोजना हुने भएको छ।

महाधिवेशनको मूल नारा रहेको छ:

"प्राकृतिक श्रोत जल, जंगल र जमिनमाथि आदिवासी जनजातिको अधिकार सुनिश्चित गर, प्राचिन सभ्यता र ऐतिहासिक पृष्ठभूमिको पहिचानको आधारमा प्रदेशहरुको पुनःनामाङकन गर"

महाधिवेशनको पहिलो दिन माघ ९ गते प्रदेश १ का विभिन्न जिल्लाबाट हजारौं आदिवासी जनजातिहरू आफ्नो मौलिक भेषभूषामा सजिएर नाचगान, झाँकी र र्‍यालीसहित विराटनगर नगर परिक्रमा गर्दै कार्यक्रमस्थल होटल मनास्लुको सभाभवनमा पुग्नेछन्। त्यसपछि उद्घाटन सत्र सुरु हुनेछ।

महाधिवेशनको अध्यक्षता NEFIN का अध्यक्ष गेल्जे लामा शेर्पाले गर्नुहुनेछ भने संस्थापक महासचिव सुरेश आले मगरको प्रमुख आतिथ्यतामा कार्यक्रम सञ्चालन हुनेछ।

महाधिवेशनलाई भव्य बनाउन १२ वटा विभिन्न उपसमितिहरू गठन गरिएको छ। 

२०४७ सालमा स्थापना भएको यो महासंघले ३५ वर्षको यात्रामा नेपालको कुल जनसंख्याको झण्डै ३६ प्रतिशत आदिवासी जनजातिको प्रतिनिधित्व गर्दै आएको छ। हाल ५६ वटा आदिवासी समुदाय र १२ वटा सम्बन्धन संगठन यसमा आबद्ध छन्। यसबाहेक विदेशमा २५ देशमा प्रवास संगठन, ७ प्रदेश, ७७ जिल्ला र ५००० भन्दा बढी स्थानीय तह समन्वय परिषदहरू सञ्चालित छन्।

अध्यक्ष गेल्जे लामा शेर्पाले जारी गरेको विज्ञप्तिमा भनिएको छ – "अस्थिर परिवेश र चुनौतीका बाबजुद यो महाधिवेशनलाई भव्य बनाउन सबैमा व्यापक उपस्थिति र सहभागिताको लागि हार्दिक अनुरोध गर्दछौं।"

महाधिवेशनले प्राकृतिक स्रोतमा अधिकार, FPIC (Free, Prior and Informed Consent) को कार्यान्वयन, जलवायु परिवर्तन, भूमि अधिकार, पहिचानसहितको प्रदेश पुनर्संरचना लगायतका मुद्दामा गहन छलफल गरी भावी रणनीति तय गर्ने अपेक्षा गरिएको छ।

सबै आदिवासी जनजाति अभियन्ता, समुदाय र शुभचिन्तकहरूलाई माघ ९ गते विराटनगरमा उपस्थित भई महाधिवेशनलाई ऐतिहासिक बनाउन अपिल गरिएको छ।