कास्की जिल्ला प्रशासनको चेतावनी: हिमपात र लेक लाग्ने जोखिमका कारण पदयात्रुहरूलाई सतर्क रहन आह्वान

पोखरा। गण्डकी प्रदेशमा आगामी तीन दिनसम्म हल्कादेखि मध्यम वर्षा र उच्च हिमाली तथा पहाडी क्षेत्रमा भारी हिमपातको सम्भावना रहेको पूर्वानुमानसँगै पदयात्रा गर्दा सतर्कता अपनाउन जिल्ला प्रशासन कार्यालय कास्कीले सबै पक्षलाई निर्देशन दिएको छ। जल तथा मौसम विज्ञान विभागले कार्तिक १० देखि १२ गतेसम्म यस्तो मौसम प्रक्षेपण गरेको छ भने पछिल्लो समय पदयात्रुहरूमा लेक लागेर मृत्यु र आपतकालीन उद्धारका घटना बढेका छन्।

जिल्ला प्रशासनले जारी गरेको सूचनामा मौसम पूर्वानुमानका आधारमा उत्पन्न हुन सक्ने जोखिम र लेक लाग्ने समस्या रोक्नका लागि १० बुँदे सतर्कताका उपायहरू उल्लेख गरेको छ। यसले पर्यटक, ट्रेकिङ व्यवसायी र स्थानीयहरूलाई विशेष सजग रहन हार्दिक अनुरोध गरेको छ। पछिल्लो समय अन्नपूर्ण क्षेत्रमा पदयात्रा गर्दा लेक लागेर एकजना पर्यटकको ज्यान गएको र अरूलाई उद्धार गर्नुपरेको घटनाले यो चेतावनी थप महत्त्वपूर्ण बनेको छ।

सूचनामा भनिएको छ, पदयात्रा गर्दा मौसम विभागको आधिकारिक सूचना पालना गर्नुका साथै उच्च हिमाली क्षेत्रमा हिमपातको जोखिमका कारण अन्नपूर्ण बेस क्याम्प, मर्नी हिमाल, खुमै डाँडा र कोरी जस्ता स्थानहरूमा मौसम सफा नहुँदासम्म नजानु। पदयात्रुहरूले पर्याप्त तयारीका साथ समूहमा यात्रा गर्न, एक्लै नजानु र हतारमा उचाइ नलिनु (एक्लिमेटाइजेसन) गर्नुपर्ने बताइएको छ।

यसबाहेक, न्यानो कपडा, तातो पानी, जीवनजल, झोलिलो खानेकुरा र लेक लाग्दा प्रयोग हुने औषधि (जस्तै एसिटोजोलामाइड) बोकेर मात्र यात्रा गर्न आग्रह गरिएको छ। धूम्रपान र मद्यपान नगर्नु, पर्याप्त पानी पिउनु र लेकका लक्षण (टाउको दुखाइ, रिंगटा, वाकवाकी) देखिए तुरुन्त तल्लो उचाइमा झर्नु पर्ने जोड दिइएको छ। निरन्तर वर्षाका कारण पहिरोको जोखिम बढेकाले सिक्लेस, घान्द्रुक र लान्द्रुक जस्ता ग्रामीण क्षेत्रमा यात्रा तथा सवारी सञ्चालन गर्दा सतर्क रहन पनि भनिएको छ।

जिल्ला प्रशासनले सबै स्थानीय तह, निजी क्षेत्र, पर्यटन तथा यातायात व्यवसायी, ट्रेकिङ एजेन्सी, नागरिक समाज र सरोकारवालाहरूलाई मौसम पूर्वानुमानअनुसार भूमिका निर्वाह गरी जनजीवनको सुरक्षामा खटिन निर्देशन दिएको छ। कुनै विपद् वा आपतकालीन उद्धार आवश्यक परेमा नजिकको स्थानीय तह, प्रहरी वा सुरक्षा निकायमा सम्पर्क गर्न सकिन्छ।

सम्पर्क नम्बरहरू:

नेपाली सेना: ०६१-५८११६०, ९७६३२४६०२२ (ड्युटी अफिसर)

नेपाल प्रहरी: १०० (प्रहरी कन्ट्रोल), ९८५६०३९५९९ (ड्युटी अफिसर)

सशस्त्र प्रहरी बल नेपाल: ०६१-५४४०८८, ९८५१२७२०८० (ड्युटी अफिसर)

पर्यटन मौसममा प्रवेश गर्दै गर्दा यो चेतावनीले हजारौं पदयात्रुहरूको सुरक्षालाई प्राथमिकता दिएको छ। जिल्ला प्रशासनले मौसम परिवर्तनसँगै बढ्दो पर्यटकीय चापलाई ध्यानमा राखेर थप निगरानी बढाउने जनाएको छ।