आज देशभर आंशिकदेखि मध्यम वर्षाको सम्भावना, गण्डकी र लुम्बिनीमा भारी वर्षाको चेतावनी

काठमाडौँ । हाल देशभर आंशिकदेखि सामान्य बदलीको अवस्था रहेको छ। कोशी, बागमती, गण्डकी र लुम्बिनी प्रदेशका विभिन्न स्थानहरूमा मेघगर्जन र चट्याङसहित हल्कादेखि मध्यम वर्षा भइरहेको छ। गण्डकी र लुम्बिनी प्रदेशका थोरै स्थानहरूमा भारी वर्षाको सम्भावना रहेको मौसम पूर्वानुमान महाशाखाले जनाएको छ।

यस वर्षको मनसुन प्रणाली असार १५ गतेदेखि नेपालमा प्रवेश गरेको थियो, जसले गर्दा देशका अधिकांश भागहरूमा निरन्तर वर्षाको क्रम जारी छ। मनसुनको प्रभावले गर्दा उच्च पहाडी तथा हिमाली क्षेत्रहरूमा समेत हल्का वर्षा वा हिमपातको सम्भावना रहेको छ।

आगामी २४ घण्टाका लागि मौसम विभागले सतर्कता अपनाउन सुझाव दिएको छ। विशेषगरी बागमती, गण्डकी, लुम्बिनी र कोशी प्रदेशमा मेघगर्जन, चट्याङसहित मध्यमदेखि भारी वर्षा हुन सक्ने भएकाले सडक, हवाई सेवा, कृषिकर्म तथा स्वास्थ्य क्षेत्रमा सावधानी अपनाउन अनुरोध गरिएको छ।

नदी तथा खोलानालाहरूमा पानीको सतह उच्च हुन सक्ने भएकाले बाढीपहिरोको जोखिमसमेत रहन सक्ने सम्भावना रहेको छ। तराई क्षेत्रका केही भू-भागमा आकस्मिक वर्षाका कारण डुबानको जोखिम पनि रहेको जानकारी दिइएको छ।