भारत मोविलिटीका सन्दर्भमा काठमाडौँमा अन्तरक्रिया कार्यक्रम सम्पन्न

काठमाडौँ। भारत मोविलिटीका सन्दर्भमा नेपालस्थित भारतीय दूतावासका प्रमुख बाणिज्य सचिव सुमन शेखरको प्रमुख आतिथ्यतामा नाडा केन्द्रीय कार्यसमितिका पदाधिकारी तथा सदस्यहरूबीच काठमाडौँमा एक अन्तरक्रिया कार्यक्रम सम्पन्न भएको छ।

कार्यक्रममा भारत र नेपालबीचको मोबिलिटी क्षेत्रमा सहकार्य बढाउने सम्भावनाहरूका विषयमा गहन छलफल भएको थियो। नाडाका प्रतिनिधिहरूले नेपालको अटोमोबाइल उद्योगमा भारतको भूमिका र योगदानको प्रशंसा गर्दै दुवै देशका उद्योगबीच सघन सहकार्य आवश्यक रहेको धारणा राखेका थिए।

भारतीय दूतावासका बाणिज्य सचिव सुमन शेखरले कार्यक्रममा बोल्दै नेपाल र भारतबीचको सार्वजनिक यातायात र विद्युतीय सवारीसाधनको प्रबर्द्धनमा सहकार्यलाई थप सशक्त बनाउने प्रतिबद्धता जनाएका थिए।

कार्यक्रममा विद्युतीय सवारीसाधनको उपयोग, सीमा क्षेत्रका व्यापारिक समस्या, र भविष्यमा दुवै देशका व्यवसायिक क्षेत्रलाई लाभ पुर्याउने परियोजनाहरूका विषयमा विचारविमर्श गरिएको थियो।

कार्यक्रमले दुई देशबीचको आर्थिक सम्बन्ध सुदृढ गर्न र मोबिलिटी क्षेत्रमा नयाँ सम्भावनाहरू खोज्न सहयोग गर्ने विश्वास आयोजकहरूले व्यक्त गरेका छन्।