भरतपुर अस्पतालमा ३० करोड लागतको थ्री टेस्ला एमआरआई सेवा सुरु, दैनिक २५ जनालाई सेवा

चितवन, २७ असार : भरतपुर अस्पतालमा ‘एमआरआई’ सेवा आजदेखि सञ्चालनमा आउने भएको छ। अस्पतालका मेडिकल सुपरिटेन्डेन्ट प्रा. डा. कृष्णप्रसाद पौडेलका अनुसार बुधबार प्राविधिक परीक्षण सफल भएपछि ‘थ्री टेस्ला एमआरआई ६४ स्लाइस’ उपकरण सञ्चालनमा ल्याउन लागिएको हो। प्रा. डा. पौडेलले जानकारी दिए अनुसार संघीय सरकारले उपलब्ध गराएको रु २५ करोड र अस्पताल विकास समितिको रु पाँच करोड गरी कुल रु ३० करोडमा मेसिन खरिद गरिएको हो।

स्वास्थ्य बीमाले तोकेको रु नौ हजारदेखि १४ हजार शुल्कमा यो उपकरणबाट स्वास्थ्य परीक्षण गरिनेछ। अस्पतालले दैनिक २५ जनासम्मलाई सेवा दिन सक्ने बताइएको छ। दुर्घटना लगायतका बिरामीको एमआरआई गर्नुपर्दा विपी कोइराला मेमोरियल क्यान्सर अस्पताल लगायत अन्यत्र जानुपर्ने बाध्यता अब हटेको छ। अस्पतालमा आउने बिरामीमध्ये धेरैजसो दुर्घटनाका बिरामी हुने बताइएको छ।

यसअघि नै अस्पतालमा सिटी स्क्यान, भिडियो एक्सरे लगायतका उपकरणहरू सञ्चालनमा थिए। साथै, अस्पतालले ‘क्याथल्याब’ सञ्चालन गर्ने तयारी पनि गरिरहेको छ।