घरजग्गा क्षेत्रमा बढ्न थाल्यो कर्जाको माग

काठमाडौँ।  अर्थतन्त्रमा सकरात्मक सुधार देखिन थालेपछि घरजग्गा कारोबार क्षेत्रमा पनि उत्साह थपिएको छ। पछिल्लो समय घरजग्गा कारोबारले लय लिन थालेपछि बैंक तथा वित्तीय संस्थाहरूमा घरजग्गा कर्जाको माग पनि बढ्न थालेको देखिन्छ।

चालू आर्थिक वर्षको पहिलो ६ महिना (साउन–पुस) मा घरजग्गा क्षेत्रमा २० अर्ब ७१ करोड रूपैयाँ कर्जा थपिएको छ। जसमध्ये २ करोडसम्मको व्यक्तिगत आवासीय घरकर्जा १५ अर्ब १५ करोड र रियल इस्टेट कर्जा पाँच अर्ब ५७ अर्ब रूपैयाँ प्रवाह भएको देखिन्छ।

गत मंसिर महिनासम्म पाँच महिनाको अवधिमा व्यक्तिगत आवासीय घरकर्जातर्फ ११ अर्ब १४ करोड रूपैयाँले बढेको थियो। पुसमा मात्रै यस्तो कर्जा करिब ४ अर्बले बढेको छ। जसले बैंक तथा वित्तीय संस्थाहरूबाट ऋण लिएर घरजग्गा किन्ने र घर बनाउनेहरू बढ्न थालेको जनाउँदछ।

पछिल्ला महिनाहरूमा घरजग्गा किनबेच, कित्ताकाट र राजश्व संकलन बढ्दै गइरहेको छ। पुसमा मात्रै देशभरका मालपोत कार्यालयबाट ४८ हजार १५६ घरजग्गाको लिखत पारित, १ लाख १५ हजार १३४ कित्ताकाट, ७१ युनिट अपार्टमेन्ट किनबेच र सवा चार अर्ब रूपैयाँ मालपोत राजश्व संकलन भएको छ। यो चालु आर्थिक वर्ष साउन यताकै उच्च रहेको भूमि व्यवस्थापन तथा अभिलेख विभागले जनाएको छ। 

६ महिनामा बैंक तथा वित्तीय संस्थाहरुबाट रियल इस्टेट शिर्षकको कर्जा ५ अर्ब ५७ करोड रूपैयाँ प्रवाह भएको देखिन्छ। तर, रियल इस्टेट शिर्षक अन्तर्गतकै रेसिडेन्सियल रियल इस्टेट (२ करोडसम्मको व्यक्तिगत आवासीय कर्जा बाहेक) र जग्गा खरिद तथा प्लटिङ कर्जा भने घटेको देखिन्छ।

नेपाल राष्ट्र बैंकका अनुसार ६ महिनामा रेसिडेन्सियल रियल इस्टेट कर्जा दुई अर्ब २४ करोड र जग्गा खरिद तथा प्लटिङ कर्जा एक अर्ब ५८ करोड रूपैयाँले खुम्चिएको छ। 

यो अवधिमा कमर्सियल कम्पलेक्स तथा रेसिडेन्सियल अपार्टमेन्ट निर्माण कर्जा एक अर्ब ७४ करोड, आम्दानी सिर्जना गर्ने कमर्सियल कम्पलेक्समा १ अर्ब ५२ करोड, निश्चित उद्देश्य प्रष्ट नपारिएको तर रियल इस्टेट शिर्षकमै प्रवाह भएको ५० लाख वा सो भन्दा बढीको कर्जा ४ अर्ब ३३ करोड रूपैयाँले बढेको देखिन्छ।