कृषि र पर्यटन प्रवर्द्धनका लागि प्रदेशस्तरीय महोत्सवको आयोजना

काठमाडौँ।  ‘आर्थिक विकासको मूल आधारः कृषि, पर्यटन, उद्योग र व्यापार’ भन्ने नाराका साथ कृषि र पर्यटन प्रवर्द्धन गर्न नवलपरासी (बर्दघाट सुस्तापूर्व) नवलपुरमा गण्डकी प्रदेशस्तरीय महोत्सवको आयोजना हुने भएको छ। 

नेपाल उद्योग वाणिज्य महासङ्घ गण्डकी प्रदेश समितिको आयोजनामा नारायणी नदी किनारमा महोत्सव हुने समितिले जानकारी दिएको छ।

कात्तिक २३ देखि मङ्सिर १० गतेसम्म सञ्चालन हुने उक्त महोत्सवबाट कृषि उत्पादनसहित पर्यटकीय क्षेत्रको प्रवर्द्धनमा सहयोग पुग्ने अपेक्षा गरिएको छ। महोत्सवले आर्थिक गतिविधि चलायमान बनाउन र नयाँ सम्भावनाको  खोजी गर्न सहयोग पुग्ने विश्वास लिइएको समितिले जनाएको छ। 

महोत्सवमा कृषि उत्पादनको प्रोत्साहनका लागि कृषि क्षेत्र तथा स्थानीय उत्पादनको बजारीकरणका लागि ५० वटासम्म स्टल निःशुल्क उपलब्ध गराइने छ। महोत्सवमा हस्तकला, कृषि, अटोमोबाइल्स, सूचना तथा प्रविधि, औद्योगिक उत्पादन, दैनिक उपभोग्य वस्तु, लत्ताकपडालगायत ३ सयवटा प्रदर्शन एवं बिक्री कक्ष रहनेछन्। 

गण्डकी प्रदेशस्तरीय महोत्सवले नवलपुरमा गण्डकी प्रदेश सरकारले गौरवको आयोजनाका रूपमा घोषणा गरेको लोकाहा औद्योगिक क्षेत्र, शुक्लागण्डकी नगरपालिका, पोखरा महानगरपालिकामा निर्माणाधीन औद्योगिक ग्राम एवं धौबादी फलाम खानी निर्माणमा सकारात्मक सन्देश प्रवाह गर्ने अपेक्षा गरिएको छ।