घरमा पानी चुहिने समस्या छ? यस्ता छन् जोगिने उपायहरू

काठमाडौँ। घर जीवनमा एकपटक निर्माण गरिन्छ। घरको सरसफाइ र हेरचाहमा ध्यान दिइएन भने विभिन्न समस्याहरू आउँछन्।

घर निर्माण भएपछि कतिपय घरमा पानी चुहिने समस्याले सबैलाई दिक्क पारिरहेको छ। पानी चुहिने र भित्ता रसाउने समस्या वर्षायाममा धेरै देखिन्छ। लगातार वर्षा हुँदा कौसीमा पानी जम्दा, जस्तापाता भए छानो भए प्वाल परेर, भित्ता चर्किएर, पाइपमा प्वाल परेर घरभित्र पानी पस्न सक्छ।

यस्तो हुँदा सफा गर्ने, कौसी वा जस्तापातामा भएको प्वाल टाल्ने, पाइप प्वाल परेमा प्लास्टिक वा कपडा कोच्ने गरिन्छ, तर यो अस्थायी मात्रै हुन्छ टिकाउ भने हुँदैन। यसको दीर्घकालीन समस्या के हुन्छ भनेर धेरै मानिहरू सोच्न बाध्य छन्। यसका लागि केही यस्ता सामग्री छन्, जसको प्रयोग गर्दा घरमा पानी चुहिने समस्याबाट मुक्त हुन सकिन्छ।

पानी चुहिने समाधानका उपायहरू

ड्याम्प प्रुफिङ स्लेरीः  यस्तो समस्या हुन नदिन घरको फिनिसिङ गर्ने बेला प्लास्टर गर्ने डयाम्प प्रुफिङ स्लेरी प्रयोग गर्न सकिन्छ। प्लास्टर गरेको भित्ता दुईचोटि लगाएपछि पुटिङ हालेर कलर लगाउँदा पानी चुहिने वा चर्किने समस्या भोग्न पर्दैन। यसलाई भित्ता, भुईं, सिलिङ र कौसीमा गर्न सकिन्छ। घरको भित्र कलर लगाउनुअघि यी कुरामा ध्यान दिनुपर्दछ।

हाइड्रो लकः घरको कुनै भित्ता घाम नलाग्ने ठाउँमा छ र चिसो वा ओसिलो हुने सम्भावना छ भने यस्तो ठाउँमा प्लास्टर वा कलर लगाउँदा केही समयमा उप्किने र पानी चुहिने सम्भावना हुन्छ। भित्तामा प्लास्टर गरिसकेपछि भित्तामा रंगरोगन गर्नु अगाडि नै त्यसमा हाइड्रो लक दुईचोटि र त्यसमाथि पुटिङ दुईचोटि लगाएर अन्तिममा कलर गर्दा भित्ता चर्किने वा कलर उप्किने समस्या आउँदैन।

 वाटर प्रुफिङ कंक्रिटः यो एक प्रकारको सिमेन्ट हो। यसमा पानी मिसाएर मज्जाले घोल्ने र त्यसपछि खस्रो प्लास्टर गरिसकेको भित्तामा लगाउन सकिन्छ। प्रायः बाथरुम, ट्वालेट र सिलिङको भित्ता र भुईंमा लगाउन सकिन्छ।

वाल फेम वा वाल प्यानलः  भित्तामा प्लास्टर गरिसकेपछि वाल फेम वा वाल प्यानल लगाइन्छ। यो नयाँ वा पुरानो दुवै घरको भित्तामा प्रयोग गर्न सकिन्छ। यसमा लगाउने ग्लु छुट्टै हुन्छ। प्लास्टर गरेको भित्तामा वा चर्किएको भित्तामा ग्लु लगाएर टाँस्दा यसले भित्ताबाट पानी लिकेज हुने वा भित्ता ओसिने समस्याबाट जोगाउनुका साथै आकर्षक पनि देखिन्छ। यो विभिन्न प्रिन्ट र डिजाइनमा पाउन सकिन्छ।

एन्टिलिकेज स्प्रेः माथिका चारवटामध्ये सबैभन्दा सजिलो सामान हो यो एन्टिलिकेज स्प्रे । फिनिसिङ भइसकेपछि घरमा भित्ता चर्किएर पानी चुहिएको वा प्वाल परेर पानी चुहिएको ठाउँमा सफा गरेर स्प्रे गर्दा पानी लिकेज बन्द हुन्छ। यसलाई घरमा आफैंले पनि प्रयोग गर्न सकिन्छ।

इन्भिजिवल वाटर प्रुफिङः फुटेको, चर्केको, छतबाट पानी चुहिने ठाउँमा ब्रसको सहायताले इनभिजिवल वाटर प्रुफिङ लगाउन सकिन्छ। यो ग्लुजस्तै सेतो खालको हुन्छ। यसबाहेक ड्रम, पाइप प्वाल परेमा यसले टाल्न पनि सकिन्छ। यसलाई एन्टिलिकेज एजेन्ट र क्रयाक हिल वेलफिक्स एजेन्ट पनि भनेर चिनिन्छ।

वाटर प्रुफिङ टेपः यदि भित्तामा वा कौसीमा सानो प्वाल भएमा यो टेप लगाउन सकिन्छ। तर यो पूरै भित्ता चर्केर परेको छ वा जस्तापाता धेरै ग्याप छ भने यो उपयुक्त हुँदैन। यो पाइप र ट्यांकी टाल्नका लागि उपयुक्त हुन्छ।