१५ दिनमै उप्कियो मन्थली–खिम्ति सडकको कालोपत्र, स्थानीयहरू आक्रोशित

रामेछाप / मन्थली–खिम्ति सडकअन्तर्गत हालै गरिएको कालोपत्र उप्किन थालेको छ। मन्थली बजारस्थित देवकोटा चोकमा १५ दिनअघि मात्र गरिएको कालोपत्र उप्किसकेको छ।

विद्यालय र कार्यालय समयमा दैनिक भीडभाड हुने यस चोकमा भित्ता काटेर सडक विस्तार तथा कालोपत्र गरिएको थियो। यहाँ गोलन्जोर कन्स्ट्रक्सनले काम गरेको थियो।

स्थानीय एवं निवर्तमान वडाअध्यक्ष नारायणदास श्रेष्ठले असारको समयमा चाँडै काम सकेर भुक्तानी लिन हतार गर्दा समस्या भएको बताए। उनले भने, “चाँडै काम सकेर भुक्तानी लिने बहानामा गुणस्तरलाई ध्यान दिइएन, त्यसै कारण समस्या भयो। मुख्य चोक (देवकोटा चोक) मै यति धेरै कमसल काम भएपछि अन्य ठाउँको अवस्था के होला?”

सडकका अन्य ठाउँमा पनि कालोपत्र उप्किएको छ। स्थानीय लालप्रसाद पोखरेलले लिखुतामाकोशी गाउँपालिका–६ को खिम्ती (तल्लो) बजारमा गरिएको कालोपत्रमा पनि उप्किन लागेको बताए। यहाँ १० मिटरभन्दा बढी सडकको कालोपत्र उप्किसकेको उनले जानकारी दिए।

वडाका वडाअध्यक्ष शिवप्रसाद न्यौपानेले आवश्यक मापदण्ड पूरा नगरी हिलो माटोमाथि नै कालोपत्र गरिएकाले चाँडै नै भत्किएको बताए। निर्माण कम्पनीलाई भत्किएका ठाउँमा फेरि कालोपत्र गर्न लगाइएको छ। अध्यक्ष न्यौपानेले भने, “निर्माण व्यवसायीले सडक मर्मतमा गुणस्तरीय काम गरेन, हिलो माटोमाथि नै कालोपत्र गरिएपछि यस्तो समस्या भयो। काम गरिरहेकै बेला हामीले ध्यानाकर्षण गराएकै थियौँ, अटेर गरेपछि अहिले त्यसको परिणाम देखियो। १५ दिनमै कालोपत्र उप्किनुले चरम लापरवाही प्रष्ट भएको छ।”

सडक डिभिजन कार्यालय सिन्धुलीका इन्जिनियर सन्देशराज ढुङ्गेलले निर्माण व्यवसायीले गुणस्तरहीन काम गरेकाले समस्या भएको र आवश्यक परीक्षण गरी चाँडै मर्मतको काम गर्न लगाइने बताए। “कालोपत्रको काम गुणस्तरीय र मापदण्डअनुसार नभएकाले यस्तो समस्या आयो, अब चाँडै नै आवश्यक कारबाही अगाडि बढाउँछौँ। व्यवसायीलाई पुनः आवश्यक मापदण्डसहित कालोपत्र गर्न लगाउने तयारी भइरहेको छ,” इन्जिनियर ढुङ्गेलले भने।

#सडकनिर्माण