घरजग्गा कारोबारबाट फागुनमा चार अर्ब राजश्‍व संकलन

काठमाडौँ।  घरजग्गाको कारोबारबाट फागुन महिनामा देशभरका मालपोत कार्यालयबाट ४ अर्ब १२ करोड रूपैयाँ राजस्व संकलन भएको छ। 

भूमि व्यवस्थापन तथा अभिलेख विभागका अनुसार अघिल्लो महिना माघको तुलनामा फागुनमा राजस्व संकलनमा वृद्धि भएको छ। जबकी, घरजग्गा कारोबारमा भने सामान्य गिरावट भएको छ।

विभागका अनुसार एक महिनामा सेवा करबाट २८ करोड ८४ लाख, रजिष्ट्रेशन दस्तुर २ अर्ब २० करोड ३८ लाख र पुँजीगत लाभकरबाट १ अर्ब ५७ करोड ७२ लाख रूपैयाँ सङ्कलन  भएको छ। 

विभागले चालु आर्थिक वर्षको पहिलो महिना साउनमा तीन अर्ब ८३ करोड ५० लाख, भदौमा ३ अर्ब ९ करोड, असोजमा ३ अर्ब ८ करोड १२ लाख, कात्तिकमा २ अर्ब ७० करोड ४० लाख, मंसिरमा ३ अर्ब ८७ करोड, पुसमा ४ अर्ब २५ करोड २२ लाख र माघमा ३ अर्ब ८७ करोड २४ लाख राजस्व सङ्कलन  गरेको थियो।

घरजग्गा करोबार संख्यामा तराइका मालपोत कार्यालय अगाडि रहेपनि राजश्व संकलनमा भने काठमाडौँ उपत्यकाका कार्यालयहरू अगाडि रहेका छन्। 

मालपोत कार्यालय कलंकीले गत फागुनमा २२ करोड ६१ लाख, मालपोत कार्यालय चाबहिल ले २१ करोड ६८ लाख ५२ हजार, मालपोत कार्यालय लगनखेलले ३८ करोड २८ लाख तथा मालपोत कार्यालय खैरहनी, चितवनले तीन करोड ९४ लाख ४१ हजार राजस्व संकलन गरेको विभागले जनाएको छ।