हिमालयन बैंकको ३२औँ साधारण सभा सम्पन्न, के के भए निर्णय?

काठमाडौँ।  हिमालयन बैंक लिमिटेडको ३२औँ बार्षिक साधारण सभा सम्पन्न भएको छ। 

बैंक सञ्चालक समितिका अध्यक्ष प्रचण्ड बहादुर श्रेष्ठको अध्यक्षतामा आयोजित सभा बैंक तथा यसका सहायक कम्पनीहरूसहितको आ.व. २०८०/८१ को एकीकृत वित्तीय विवरण पारित गर्दै सम्पन्न भएको हो। 

सभामा सञ्चालक समितिको तर्फबाट अध्यक्ष श्रेष्ठले शेयरधनीहरूलाई बैंकको दरबारमार्गस्थित आफ्नै जग्गामा भवन निर्माण गरी उक्त शाखालाई स्थानान्तरण गरी सोही आर्थिक वर्षबाट हिटी दरबार शाखाको नामबाट बैंकिङ्ग सेवा सञ्चालनमा ल्याइसकेको जानकारी गराए।  

सेवाको शुभारम्भ सोही स्थानबाट गरेको हुँदा बैंकले सञ्चयकोषको उक्त भवनको प्रवलिकरण पश्चात् ग्राहकहरूलाई बैंकिङ्ग सेवा प्रदान गर्नको लागि आवश्यक स्थान पुनः भाडामा लिने प्रक्रियामा रहेको पनि जानकारी गराए। 

यसका साथै नयाँ सडकमा पनि बैंकले आफ्नै जग्गामा शाखा कार्यालयको लागि भवन निर्माण कार्य प्रारम्भ गरिसकेको जानकारी गराए। 

यस पश्चात् बैंकका अध्यक्ष श्रेष्ठले आर्थिक वर्ष २०८०/०८१ का प्रतिवेदन प्रस्तुत गर्दै वर्तमान संकुचित आर्थिक परिवेशको अवस्थामा पनि र्बैकको खुद मुनाफा रू १ अर्ब २३ करोड ८३ लाख ३ हजार रहेको र गणना गर्दा बैंकको खुद आम्दानी रू १ अर्ब २ करोड ३९ लाख १ हजार रहेको जसमध्ये अनिवार्य जगेडा कोषमा सो वर्षको खुद मुनाफाको २० प्रतिशतले हुन आउने रू २५ करोड ७६ लाख ६० हजार छुट्याइएको जानकारी दिए। 

यसैगरी बैंकको निक्षेप अघिल्लो वर्षको तुलनामा ६.८९ प्रतिशतले वृद्धि भई  रू २ खर्ब ९७ अर्ब ७२ करोड ५३ लाख पुगेको, कर्जा सापट १.७९ प्रतिशतले वृद्धि भई रू २ खर्ब ४७ अर्ब १० करोड ९० लाख रहेको जानकारी गराए। 

सो अवधिमा बैंकको कुल सम्पत्ति ६.४२ प्रतिशत र खुद सम्पत्ति ३‍.१४ प्रतिशतले वृद्धि भई क्रमशः रू ३ खर्ब ५५ अर्ब ७३ करोड ५८ लाख र रू ३६ अर्ब ६२ करोड ३१ लाख पुगेको पनि जानकारी गराए। 

नियमनकारी निकाय नेपाल राष्ट्र बैंक तथा नेपाल चार्टड एकाउन्टेन्ट संस्थाबाट जारी निर्देशनको अधिनमा रही कर्जामा सम्भावित नोक्सानीको लागि उल्लेख्य रकम व्यवस्था गर्नु परेकोले समीक्षा वर्षमा बैंकले रू २ अर्ब ८८ करोड ५४ लाख मात्र सञ्चालन मुनाफा आर्जन गरेको र खुद मुनाफा रू १ अर्ब २३ करोड ८३ लाखमा सीमित भएको जानकारी दिए। 

यस समीक्षा वर्षमा बैंकले नेपाल राष्ट्र बैंकको निर्देशनको परिधिभित्र रही रू १ अर्ब १२ करोड ४३ लाख ४८ हजार कर्जा तथा व्याज अपलेखन गरेको छ भने विगत वर्षहरूमा अपलेखन भएका कर्जाबाट रू १ करोड ४ लाख १८ हजार असुली गर्न सफल भएको छ। 

अपलेखन गरिएको कर्जाका साथै अन्य निष्क्रिय कर्जाको असुलीले चालू आर्थिक वर्षको नाफामा सहयोग पुग्ने विश्वास दिलाए। 

बैंकले स्थापनाकाल देखि नै नियमित रूपमा आफना शेयरधनीहरूलाई बोनस शेयर तथा नगद लाभांशको रूपमा आर्कषक मुनाफा दिने गरेकोमा अघिल्लो वर्ष तथा यस वर्ष सोलाई निरन्तरता दिन नसकेकोमा दुःख व्यक्त गर्दै कर्जा नोक्सानी व्यवस्था लगायत अन्य शीर्षकमा रकमान्तर भएको रकम फिर्ता गरी आगामी दिनमा पहिले जस्तै आकर्षक लाभांश दिने कुरामा जोड दिए।