पाटन प्रिमियर लिगः गुरुखोला र पञ्चेश्वरको विजयी सुरूवात

काठमाडौँ।  बैतडीको पाटनमा जारी पाटन प्रिमियर लिग चौथो संस्करणको छैटौँ दिन आज दुई खेल सम्पन्न भएका छन्। जसमा टिम कोइनोडा गुरुखोला लायन्स र पञ्चेश्वर गाउँपालिका विजयी भए।

पहिलो खेलमा गुरुखोलाले सागर स्पोर्टस क्लब मेलौलीलाई आठ विकेटले हरायो। जितका लागि पाएको ६९ रनको लक्ष्य गुरुखोलाले चार दशमलव पाँच ओभरमा दुई विकेटको क्षतिमा लक्ष्य भेट्टायो। जसमा लोकेश चन्दले अविजित ४९ रनको योगदान गरे। सागर स्पोर्टसका लागि आकाश विष्टले एक विकेट लिए।  

यसअघि श्रीकृष्ण मावि पाटनको खेलमैदानमा टस जितेर पहिला ब्याटिङ गरेको सागर स्पोर्टस १३ दशमलब चार ओभरमा ६८ रनमा समेटियो। जसमा धुर्व नायकले १५ रन बाहेक अन्यले दोहोरो अङ्कमा रन जोड्न सकेनन्।

गुरुखोलाका लागि विकास आग्रीले तीन विकेट लिए। म्यान अफ द म्याचसमेत चुनिएका विकासले तीन ओभर बलिङ गर्दै दुई मेडन राखेर चार रन खर्चिँदै तीन विकेट हात पारेका हुन्। 

आजै सम्पन्न अर्को खेलमा पञ्चेश्वरले पाटन स्टार क्रिकेट क्लबलाई ८६ रनले हरायो। टस हारेर पहिला ब्याटिङ्ग गरेको पञ्चेश्वरले निर्धारित २० ओभरमा आठ विकेटको क्षतिमा २३३ रन बनायो। जसमा कप्तान अभिषेक पालले १४२ रन जोडे। स्टारका लागि धिरेन्द्र ऐरीले तीन तथा पंकज चन्दले दुई विकेट लिए।

जितका लागि २३४ रनको विशाल लक्ष्य पछ्याएको स्टारले निर्धारित २० ओभरमा छ विकेट गुमाएर १४७ रन मात्रै बनायो।  जसमा सुदर्शन भट्टले ४४, दिनेश जोशी ३० र आयुश ठगुन्नाले २७ रनको योगदान गरेपनि टोलीलाई जिताउन सकेनन्। पञ्चेश्वरका जयराम भट्टले तीन र विरेन्द्र नाथले दुई विकेट हात पारे।

अभिषेक प्लेयर अफ द म्याच चुनिएको स्कोरर दीपेन्द्रबहादुर बोहराले जानकारी दिए। पाटन क्रिकेट क्लबको आयोजनामा गत असोज ३० गतेदेखि शुरू प्रतियोगितामा १७ टोलीको सहभागिता छ। सहभागी टोलीलाई छ समूहमा विभाजन गरेर प्रतिस्पर्धा गराइएका छन्।

प्रतियोगिताको प्रथम पुरस्कार रु एक लाख २३ हजार चार सय ५६ नगदसहित ट्रफी, मेडल, र प्रमाणपत्र प्रदान रहेको आयोजक पाटन क्रिकेट क्लबका अध्यक्ष किरन चन्दले बताए। द्वितिय पुरस्कार रू ५६ हजार सात सय ८९ नगदसहित ट्रफी, मेडल, र प्रमाणपत्र रहेको आयोजकले जनाएको छ। 

म्यान अफ द सिरिज बापत रू १२ हजार तीन सय ४५ नगदसहित ट्रफी, मेडल र प्रमाणपत्र प्रदान गरिने छ। बेस्ट बलर र ब्याट्सम्यानलाई पनि समान रू छ हजार सात सय ८९ नगदसहित ट्रफी, मेडल र प्रमाणपत्र प्रदान गरिने जनाइएको छ।