काठमाडौँको वायु प्रदूषण अझै उच्च, स्वास्थ्य सतर्कता अपनाउन अनुरोध

काठमाडौँ।  काठमाडौँ उपत्यकामा एकसातादेखि वायु प्रदूषणको अवस्था अति अस्वस्थकर बन्दै आएको छ। आइक्यू एअरले आइतबार बिहान गरेको मापनअनुसार काठमाडौँ उपत्यका विश्वको दोस्रो प्रदूषित शहरको रूपमा रहेको जनाएको छ।

अहिले काठमाडौँ उपत्यकाको ‘एयर क्वालिटी इन्डेक्स’ (एक्यूआई) अर्थात औसत वायु गुणस्तर सूचक २११ रहेको छ। वायुको गुणस्तर सूचकांक अनुसार यसलाई निकै अस्वस्थकर मानिन्छ।

वायु प्रदूषणमा भारतको दिल्ली पहिलो स्थानमा छ। जहाँ एक्यूआई २९० छ। यस्तै, तेस्रो स्थानमा रहेको पाकिस्तानको लाहोरको १९९ एक्यूआई छ। लामो समयदेखि पानी नपर्नु र नेपालका विभिन्न जङ्गलमा लागेको डढेलो र धुवाँका कारण काठमाडौँको आकाशमा धुलो थुप्रिएकाले वायु प्रदूषण उच्च भएको छ।

विश्व स्वास्थ्य सङ्गठनको मापदण्डअनुसार मानव स्वास्थ्यका लागि वायुको गुणस्तर सूचकाङ्क ० देखि ५० सम्म स्वास्थ्यको लागि राम्रो मानिन्छ।  स्वास्थ्य मन्त्रालयले काठमाडौँ उपत्यकाको वायु खतरनाक अवस्थामा रहेकाले यसबाट बच्न सतर्कता अपनाउन आग्रह गरेको छ। साथै अनावश्यक रूपमा घरबाट बाहिर ननिस्कन र निस्कनै पर्ने भए मास्कको प्रयोग गर्न अनुरोध गरेको छ।