नेपाल मेडिकल एण्ड ल्याब एक्स्पो २०२५: काठमाडौंमा आठौं संस्करणको भव्य आयोजना हुने

काठमाडौं,  नेपालको सबैभन्दा ठूलो चिकित्सा तथा ल्याबसम्बन्धी व्यापारिक प्रदर्शनी नेपाल मेडिकल एण्ड ल्याब एक्स्पो २०२५ (८औं संस्करण) आगामी फेब्रुअरी २७ देखि मार्च १ सम्म काठमाडौंको भृकुटीमण्डप प्रदर्शनी हलमा आयोजना हुने भएको छ।

स्वास्थ्य सेवा, चिकित्सा उपकरण, डायग्नोस्टिक प्रविधि तथा अनुसन्धान प्रयोगशालाको क्षेत्रमा नेपालकै महत्वपूर्ण B2B प्रदर्शनीको रूपमा स्थापित यस एक्स्पोमा विश्वभरका नवीनतम प्रविधि तथा उत्पादनहरू प्रस्तुत गरिने आयोजकहरूले जनाएका छन्। Nepal Medical Show (NMS) को रूपमा परिचित यस एक्स्पोले प्रमुख अस्पताल, चिकित्सक, प्याथोलोजिस्ट, वैज्ञानिक, डिलर, वितरक, आयातकर्ता, खुद्रा विक्रेता तथा अन्य खरिदकर्ताहरूलाई एउटै मञ्चमा जोड्नेछ।

यस संस्करणमा भारत, नेपाल, बंगलादेश, सिंगापुर, मलेसिया, चीन, जर्मनी, पाकिस्तान लगायतका देशका उच्चस्तरीय आपूर्तिकर्ताहरूको सहभागिता रहनेछ। यी प्रदर्शकहरूले आधुनिक प्रविधियुक्त चिकित्सा उपकरण, डायग्नोस्टिक सामग्री, ल्याब टेक्नोलोजी तथा नवीनतम डिजाइनका उत्पादनहरू प्रदर्शन गर्नेछन्।

गत वर्षको एक्स्पोमा ९,००० भन्दा बढी आगन्तुकहरू सहभागी भएका थिए भने १५ देशका ५०० भन्दा बढी ब्रान्ड तथा उत्पादकहरूले आफ्ना नवीनतम उत्पादनहरूको प्रदर्शनी गरेका थिए। नेपालका अस्पताल, ल्याब तथा स्वास्थ्य संस्थाहरूसँग प्रत्यक्ष कारोबारका अवसर पाएको बताउँदै प्रदर्शकहरूले एक्स्पोको प्रशंसा गरेका थिए।

नेपालको स्वास्थ्य सेवा बजार तीव्र रूपमा वृद्धि भइरहेकाले मेडिकल तथा ल्याब उपकरणहरूको माग उच्च रहेको व्यवसायीहरूको भनाइ छ। नयाँ अस्पताल परियोजनाको संख्या बढ्दै गइरहेको र गुणस्तरीय चिकित्सा उपकरणहरूको आवश्यकता उच्च भएको कारण यो एक्स्पो नेपाली बजारका लागि विशेष महत्त्वपूर्ण हुने आयोजकहरूले बताएका छन्।

नेपाल मेडिकल एण्ड ल्याब एक्स्पो CHEMSAN (केमिकल एण्ड मेडिकल सप्लायर्स एसोसिएसन अफ नेपाल), EEPC INDIA (इन्जिनियरिङ एक्सपोर्ट प्रमोशन काउन्सिल) तथा SD Promo Media द्वारा सह-आयोजित हुनेछ। साथै अन्य प्रमुख चिकित्सा तथा व्यापार संगठनहरूको पनि सहकार्य रहनेछ।

नेपालमै अन्तर्राष्ट्रिय स्तरको व्यापारिक प्रदर्शनीको रूपमा स्थापित नेपाल मेडिकल एण्ड ल्याब एक्स्पो २०२५ ले चिकित्सा तथा ल्याब उद्योगका व्यवसायीहरूलाई आपसी सहकार्य, बजार प्रवर्द्धन, नयाँ ग्राहक प्राप्ति तथा नवीनतम प्रविधि अवलोकनका अवसरहरू प्रदान गर्ने अपेक्षा गरिएको छ।