ग्लोबल रिसाइक्लिङ डेको अवसरमा बीवाईडीको उन्नत ब्याट्री रिसाइक्लिङ कार्यक्रम, हरित भविष्यको प्रतिबद्धता

काठमाडौं। इलेक्ट्रिक सवारी साधन निर्माता बीवाईडी (BYD) ले ग्लोबल रिसाइक्लिङ डेको अवसरमा आफ्नो ब्याट्री रिसाइक्लिङ र पुन: प्रयोग कार्यक्रम सार्वजनिक गरेको छ। यस पहलमार्फत, कम्पनीले वातावरणीय दिगोपनाप्रति आफ्नो प्रतिबद्धतालाई थप सशक्त बनाएको छ।

बीवाईडीले सर्कुलर इकोनोमी अवधारणाअनुसार लिथियम–आयोन ब्याट्रीहरूको सुरक्षित र उत्तरदायी रिसाइक्लिङ सुनिश्चित गर्न दुई प्रमुख कम्पनीहरूसँग सम्झौता गरेको छ। अमेरिकाको क्यालिफोर्नियामा अवस्थित आइटी एसेट पार्टनर्स इंक (IT Asset Partners Inc.) र चीनको वुहुमा रहेको एन्हुई लेचेङ लिथियम–आयोन टेक्नोलोजी (Anhui Lecheng Lithium Ion Technology) कम्पनी लिमिटेड मार्फत रिसाइक्लिङ प्रक्रिया सञ्चालन गरिनेछ।

बीवाईडीको यो नयाँ रिसाइक्लिङ कार्यक्रम सन् २०२४ को मे २८ मा घोषणा गरिएको थियो। उक्त कार्यक्रमले इलेक्ट्रिक सवारी साधनमा प्रयोग भएका लिथियम–आयोन ब्याट्रीहरूलाई सुरक्षित रूपमा रिसाइकल गर्ने, पुन: प्रयोगको सम्भावना मूल्यांकन गर्ने र वातावरणमैत्री तरिकाले डिस्म्यान्टलिङ तथा मेटेरियल रिकभरी प्रक्रियालाई प्रवर्धन गर्ने लक्ष्य लिएको छ।

बीवाईडीले अपनाएको रिसाइक्लिङ विधि R2 सर्टिफाइड (Responsible Recycler Certified) अन्तर्राष्ट्रिय मापदण्ड अनुरूप छ। यस अन्तर्गत:

✔ क्यापासिटी टेस्टिङ – पुन: प्रयोग योग्य ब्याट्रीहरूको मूल्यांकन

✔ सेफ डिस्म्यान्टलिङ – प्रयोगमा नआउने ब्याट्रीहरूको सुरक्षित व्यवस्थापन

✔ मेटेरियल रिकभरी – लिथियम, निकेल, कोबाल्टजस्ता महत्वपूर्ण धातुहरूको पुनः प्रयोग

✔ इको-फ्रेन्ड्ली प्रोसेसिङ – वातावरणमैत्री विधिबाट संसाधनको पुन: उपयोग

नेपालमा इलेक्ट्रिक सवारी साधनको प्रयोग बढिरहेको सन्दर्भमा, जिम्मेवार ब्याट्री रिसाइक्लिङको आवश्यकता झन् महत्त्वपूर्ण बनेको छ। बीवाईडी नेपालका आधिकारिक वितरक साइमेक्स इंक (Cimex Inc.) का सीईओ साहिल श्रेष्ठका अनुसार, ‘इलेक्ट्रिक सवारी साधन उत्पादन मात्र पर्याप्त होइन, यसको सम्पूर्ण जीवनचक्रलाई सर्कुलर इकोनोमीमा ल्याउनु नै दिगोपनाको सही बाटो हो। बीवाईडीले अपनाएको ब्याट्री रिसाइक्लिङ प्रक्रिया वातावरणमैत्री ईभी प्रविधि सुनिश्चित गर्ने प्रमुख उपाय हो।’

बीवाईडीको यो पहलले नवीकरणीय ऊर्जा, दिगो यातायात र उत्तरदायी ब्याट्री व्यवस्थापनलाई प्राथमिकता दिएको छ। कम्पनीले हरित भविष्य निर्माणलाई केवल नारामा सीमित नराखी, व्यवहारिक रूपमा इभी इकोसिस्टमको प्रत्येक पक्षलाई दिगोपनातर्फ उन्मुख गराउने नीति लिएको छ।

ग्लोबल रिसाइक्लिङ डेको अवसरमा घोषणा गरिएको बीवाईडीको ब्याट्री रिसाइक्लिङ कार्यक्रमले इलेक्ट्रिक सवारीको वातावरणीय प्रभाव न्यूनीकरण गर्दै भविष्यका लागि थप दिगो विकल्पहरूको मार्ग प्रशस्त गर्ने अपेक्षा गरिएको छ।