कोशी र बागमतीमा मध्यम देखि भारी वर्षाको सम्भावना

काठमाडौँ । नेपालमा हाल मनसुनको न्यून चापीय रेखा सरदर स्थानको दक्षिणतर्फ अवस्थित रहेकाले मनसुनको प्रभाव केही कमजोर देखिएको मौसम पूर्वानुमान महाशाखाको अनुमान छ। यद्यपि, बंगालको खाडीबाट जलवाष्पयुक्त हावाको प्रवाह कायमै रहेको छ।

देशभर सामान्यतया बदलीको अवस्था छ भने सुदूरपश्चिम र कर्णाली प्रदेशका पहाडी भू-भागका केही स्थानहरूमा र लुम्बिनी प्रदेशका एक-दुई स्थानमा मध्यम वर्षा भइरहेको छ। 

कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशमा दिउँसो हिमाली क्षेत्रमा सामान्य बदलीसहित केही स्थानमा मध्यम वर्षा, पहाडी क्षेत्रमा सामान्य बदलीसहित केही स्थानमा मध्यमदेखि भारी वर्षा र तराई क्षेत्रमा सामान्य बदलीसहित थोरै स्थानमा मध्यम वर्षाको सम्भावना छ।

रातको समयमा हिमाली क्षेत्रमा सामान्य बदलीसहित थोरै स्थानमा मध्यम वर्षा, पहाडी क्षेत्रमा सामान्य बदलीसहित थोरै स्थानमा मध्यमदेखि भारी वर्षा र तराई क्षेत्रमा आंशिकदेखि सामान्य बदलीसहित एक-दुई स्थानमा मध्यम वर्षाको सम्भावना छ।

आगामी २४ घण्टाका लागि चेतावनी तथा परामर्श

कोशी प्रदेश र बागमती प्रदेशको पहाडी भू-भागका एक-दुई स्थानमा भारी वर्षाको सम्भावना रहेकोले पछिल्लो मौसमी सूचनाको जानकारी लिन सर्वसाधारण तथा सबै सरोकारवाला निकायहरूमा अनुरोध छ।