आजको मौसम अपडेट: देशभर सफा, केही पहाडी भूभागमा हल्का वर्षा र हिमपातको सम्भावना

काठमाडौँ ।  देशभर आज मौसम मुख्यतः सफा रहने जल तथा मौसम विज्ञान विभागले जानकारी दिएको छ। यद्यपि, स्थानीय वायू र पश्चिमी वायूको आंशिक प्रभावका कारण विशेषगरी कोशी र गण्डकी प्रदेशका पहाडी क्षेत्रमा आंशिकदेखि सामान्य बदलीको अवस्था रहनेछ।

दिउँसो कोशी, बागमती, गण्डकी र कर्णाली प्रदेशका उच्च पहाडी तथा हिमाली भूभागका एक-दुई स्थानहरूमा मेघगर्जन र चट्याङ्गसहित हल्कादेखि मध्यम वर्षा हुने सम्भावना छ। त्यसैगरी, कोशी र गण्डकी प्रदेशका केही स्थानमा हल्का हिमपात पनि हुनसक्ने देखिएको छ।

राति मौसम केही परिवर्तनशील रहनेछ। कोशी र गण्डकी प्रदेशका पहाडी भूभागमा आंशिक बदली रहने भए पनि अन्य क्षेत्रको मौसम सफा रहने विभागले जनाएको छ। उच्च पहाडी तथा हिमाली क्षेत्रमा हल्का वर्षा र हिमपात सम्भावित रहेका कारण सावधानी अपनाउन आग्रह गरिएको छ।

मौसमको यस्तो अवस्था स्वास्थ्य, कृषि, तथा हवाई यात्रामा आंशिक असर पार्न सक्ने भएकाले नागरिकहरूलाई आवश्यक सतर्कता अपनाउन विभागले सुझाव दिएको छ।