देशभर आंशिकदेखि सामान्य बदली, केही स्थानमा मेघगर्जनसहित वर्षाको सम्भावना

काठमाडौं। नेपाल मौसम पूर्वानुमान महाशाखाका अनुसार आज शुक्रबार देशका धेरैजसो भू–भागमा आंशिकदेखि सामान्य बदलीको अवस्था रहनेछ। हाल देशमा पश्चिमी वायु र स्थानीय वायुको प्रभाव कायम रहेको छ, जसका कारण विभिन्न स्थानहरूमा मेघगर्जन, चट्याङ र हल्कादेखि मध्यम वर्षासमेत हुने सम्भावना छ।

बिहानैदेखि काठमाडौं उपत्यकामा आंशिक बदली देखिएको छ भने दिउँसो र साँझतिर मौसममा थप बदली र छिटपुट वर्षाको सम्भावना रहेको छ। गण्डकी, लुम्बिनी, कर्णाली र सुदूरपश्चिम प्रदेशका पहाडी क्षेत्रमा मेघगर्जनसहित वर्षाको सम्भावना बलियो देखिएको छ।

कोशी प्रदेश, मधेश प्रदेश, बागमती प्रदेश लगायत देशको पहाडी भू-भागमा आंशिक देखि साधारणतया बदली रही बाँकी भू-भागमा मौसम मुख्यतया सफा रहेको छ । कोशी प्रदेश र मधेश प्रदेशको एक-दुई स्थानमा मेघगर्जन/चट्याङ सहित हल्का देखि मध्यम वर्षा भैरहेको छ ।

आगामी २४ घण्टाका लागि चेतावनी तथा परामर्श :

महाशाखाले कोशी प्रदेशका केही स्थानहरूमा बाँकी पहाडी भू-भागका थोरै स्थानहरूमा तथा बाँकी भू-भागका एक-दुई स्थानमा मेघगर्जन/चट्याङ सहित हल्का देखि मध्यम वर्षाको सम्भावना रहेको छ। देशका उच्च-पहाडी तथा हिमाली भू-भागका थोरै स्थानहरूमा हल्का वर्षा/ हिमपातको सम्भावना रहेको छ।